– Me var fem som køyrde opp til Trondheim på fredag, og hadde ikkje spesielt høge forhåpningar. Det var eigentleg veldig overraskande, seier Gisle Sølvberg, styreleiar i Perfectly Paranormal.
Fredag vann dei prisen for Årets norske spel for Den Hellige Fy Flate. Dei plukka også med seg fire andre prisar.
– Me såg kor mange sterke kandidatar det var blant dei nominerte, og tenkte at me kanskje hadde sjansen til to av prisane. Dei skreiv me talar for på bilturen. Så måtte me improvisere litt, hehe.
Ein god fest
Sigersrekkja blei feira gjennom mingling med resten av den norske spelbransjen i etterkant av prisutdelinga.
– Det var veldig hyggeleg. Det blei jo litt allsong på karaokebaren, seier Sølvberg.
Perfectly Paranormal lanserte spelet sitt i september, og har fått gode tilbakemeldingar.
Spelet har 86 på Metacritic og stort sett berre positive meldingar på Steam.
– Eg sit ikkje på konkrete salstal. Det har ikkje gått kjempebra, men det sel, seier Sølvberg.
Tøffe tider
Utviklarselskapet er for tida fire personar på heiltid. På det meste var dei sju under utviklinga av Den Hellige Fy Flate, då dei hadde behov for hjelp under dei mest arbeidskrevjande fasane.
Noreg, USA og Storbritannia utmerker seg for salet av spelet, mens Manual Samuel visstnok går som varmt kveitebrød i Kina.
– Det er interessant. Håpet for Den Hellige Fy Flate var ein litt større inntektsstraum, slik at me kunne skalere opp staben. Det har dessverre ikkje blitt innfridd, seier Sølvberg.
– Det er jo mange som kjenner på harde tider. Har de måtte permittere?
– Det vil eg ikkje uttale meg om no, men som du seier, det går ikkje kjempebra for bransjen. Me har kontinuerlege vurderingar rundt dette.
– Kva er den største utfordringa dykkar rundt spelet?
– Det har vore å få gjennomslag. På marknadsføringssida handlar det om å slå gjennom i jungeltelegrafen, slik at me får ei meir organisk spreiing, seier Sølvberg.
Nytt underskott, men lys i tunnelen
Rekneskapstala for Perfectly Paranormal i 2024 er ikkje klare enno, men det blir eit raudt år, fortel Sølvberg.
2023 enda med eit underskott på 776.000 kroner. Det har tæra på eigenkapitalen deira.
– Me hadde store utgifter til utvikling i 2024, seier Sølvberg.
Selskapet har fått 3,4 millionar kroner i støtte frå Norsk Filminstitutt til Den Hellige Fy Flate.
– Har de noko nytt på gang?
– Me jobbar med eit prosjekt.
– Når får me høyre meir om det, då?
– Kanskje innan neste månad, svarar han.
Sølvberg fortel at den store ambisjonen for selskapet, heilt frå starten i 2014-2015, var å hente inspirasjon frå suksessen til Marvel med å bygge eit eige univers.
– Korleis har det gått?
– Det er framleis det store målet vårt. No har me kome dit at når andre lanserer spel som minner om Manual Samuel, ser me andre kalle det for eit Manual Samuel-type spel. Det er veldig kjekt. Me har sett eit fotavtrykk i kulturen og laga noko som er blitt eit samanlikningsgrunnlag, avsluttar Sølvberg.
Gamer.no-skribent Andreas Gjøsæther Jensen var del av juryen til Spillprisen.
