Gamer.no har gått gjennom rekneskapane til norske spelutviklarar for 2023.
Nokre nye namn har etablert seg, nokon har hatt store tap mens andre veks vidare inn i skyene.
Norsk spelbransje er ein vesleputt samanlikna med nabolanda våre, men sparkar godt ifrå seg samanlikna med nokre år tilbake.
Funcom er stadig den største drivaren av bransjeveksten i reine kroner, og ein kan nok vente ein betydeleg oppgang i bransjeomsetninga dersom Dune: Awakening blir ein suksess i 2025 – men dei tala får me ikkje før i 2026 igjen.
Heile lista ser du i botnen av saka.
Deprimerande år
Interessa for spel hadde ein klar topp under nedstenginga i 2020. Sidan den gongen har bransjeoverskriftene vore fylt av ord som «nedbemanning» og «permittering».
Den norske spelbransjen har også merka på tøffare tider. Dei fleste er små eller mellomstore utviklarar, der konkurransen mot stadig fleire spel gjer det vanskeleg å overleve.
– Du må lage kvalitetsprodukt for å klare deg, sa Tobias Kaasa Fossheim, dagleg leiar hos Krillbite, til Gamer.no om dette i fjor.
Det er greitt å ha i bakhovudet at spelutvikling – som produktutvikling elles – går i fasar. Mange selskap vil ha fleire år med underskott før dei lanserer spel.
Tapar hundrevis av millionar
Funcom hadde ein tilbakegang i omsetninga frå 2022 til 2023. I fjor hadde dei inntekter på 344,4 millionar kroner, og landa på eit underskott på 278,5 millionar.
Dei er tungt inne i ein investeringsfase mot sitt neste storspel. Trass det heftige tapet har dei styrka eigenkapitalen sin betydeleg.
Funcom har kinesiske Tencent i ryggen som ein kapitalsterk eigar. Likevel er dei avhengige av at Dune: Awakening blir ein suksess.
Etter omsetning er Qvisten Animation nest størst.
Dei reduserte omsetninga med over 40 millionar frå 2022 til 2023. Både dei og tredjeplass Agens driv meir med andre ting enn spel.
Agens hadde derimot ein betydeleg vekst i både inntekter og årsresultat.
Pengemaskinen Bertheussen It har redusert omsetninga og resultatet noko dei siste åra, men rakar framleis inn og hamna 57 millionar i pluss.
Ny utfordrar
Det er få tungvektarar i den norske spelbransjen, men Trondheim-selskapet Breach er i ferd med å etablere seg i toppen.
Omsetninga deira auka frå 27,7 millionar i 2022 til 54,4 millionar i 2023. Årsresultatet var oppunder 20 millionar kroner i pluss.
Breach utviklar spel innan virtuell og utvida verkelegheit.
Veksten er eit resultat av styrka samarbeid med internasjonale utgivarar og samarbeidspartnarar, fortel dagleg leiar Marius Thorvaldsen.
– Det har gitt oss moglegheita til å jobbe med større prosjekt med høgare budsjett. Dette har ført til ei betydeleg auke i omsetninga vår, samtidig som me har klart å halde fokus på kvalitet og innovasjon i spela og opplevingane våre, seier han til Gamer.no.
Den største utfordringa deira har vore å sikre berekraftig drift over tid.
– Dette krev nøye planlegging og langsiktigheit i prosjekta me jobbar med. Me må også rette oss etter geopolitiske spenningar og usikkerheit i verdsøkonomien, som kan påverke både finansiering og marknadstilgang, seier Thorvaldsen.
Breach er no oppe i 50 medarbeidarar. Målet er å halde fram med å utvikle meir ambisiøse og innovative spelopplevingar, både aleine og saman med andre.
– Me ser eit stort potensial i å utvide porteføljen vår, med både større og smalare spel og opplevingar, primært retta mot XR-marknaden. Me ønsker å nå eit endå breiare publikum, både nasjonalt og internasjonalt.
Dei jobbar med fleire parallelle prosjekt.
Tøff start
Raidho Games har også hatt kraftig vekst dei siste åra. Dei starta opp i 2021, og er i dag sju tilsette.
Omsetninga klatra frå 1,3 millionar i 2022 til 2,8 millionar i 2023.
Same år lanserte dei hestespelet Astride i tidleg tilgang på Steam, og pussar på det inn mot ei fullansering.
– Det er framleis ein del igjen av spelet, og me jobbar med å kome oss til alfastadiet for Astride. Sidan me har ein heimelaga fleirspelar, blir spelet sydd saman rundt dette. Spelet og firmaet veks dess lenger me kjem i produksjonen, seier dagleg leiar Maja Nygjelten.
I første omgang er målet å kunne stå på eige bein, og deretter vil dei vekse og etablere seg som ein attraktiv arbeidsplass for fleire norske utviklarar.
– Økonomien er utfordrande. Spesielt når me no har gått lenge utan støtte. Prisane aukar og aukar, og det hjelper lite for oss som vil vekse, seier Nygjelten.
Dei jobbar aktivt med å auka salet frå Astride, og ser ein liten oppgang ved kvar oppdatering.
Raidho har fått støtte frå Norsk filminstitutt og Østnorsk filmsenter til utviklinga.
– Det har betydd mykje, og har gitt oss moglegheita til å arbeide med spelet på fulltid. Det viser tydeleg forskjell når me må stå for 25 prosent av budsjettet og staten dekkjer 75 prosent. Det gir ei enorm tryggleiksfølelse og ein god motivasjon for teamet.
Det ville tatt lang tid å bygge selskapet utan støtta, meiner Nygjelten.
Negativ eigenkapital
Hamar-baserte Sarepta Studio lanserte nyleg Thalassa: Edge of the Abyss etter ein lengre utviklingsperiode.
Mange utgivarar krev å få tilbake investeringane sine i spel, som er tilfelle med Thalassa. Der skal utgivaren få dekka sine kostnadar før Sarepta kan hanke inn sine inntekter.
Difor blir mesteparten av omsetninga for spelet først ført i 2025.
Sarepta hadde ei omsetning på 7,2 millionar kroner og eit underskott på i underkant av 3,5 millionar i 2023. Eigenkapitalen deira var 1,5 millionar i minus ved utgangen av året.
– Korleis skal de bygge opp fundamentet i økonomien igjen?
– Det blir viktig å bygge ein sterk merkevare. Sidan spel tar så lang tid å lage, er det ekstremt viktig for oss med å få innleiande midlar frå til dømes regionale filmfond og nasjonale midlar gjennom NFI, seier dagleg leiar Catharina Due Bøhler.
Merkevara My Child Lebensborn – som Sarepta skal lansere ein oppfølgar til i slutten av 2025 – har dei tent pengar på i mange år.
– Me såg stor suksess tre år etter lansering. Ein må jobbe for å utnytte det ein allereie har, seier ho.
Selskapet skriv i årsrekneskapen at dei trur på vidare drift.
– Det driv oss
Sarepta er for tida 12 tilsette. Målet er å bygge organisasjonen opp til 18 til 25 medarbeidarar.
– Me ønsker å verne om arbeidsmiljøet og arbeidskulturen vår. Ein ser ofte at dette endrar seg over 25, seier Bøhler.
– Kor vanskeleg er det eigentleg å få økonomien til å gå rundt i eit lite utviklarselskap?
– Det er omtrent på linje med mykje anna grunderverksemd. Mitt inntrykk er vel at spelbransjen er litt meir seigliva.
– Korleis det?
– Der andre entreprenørar kanskje ville gitt opp og sagt at dei ikkje fekk det til, krummar me nakken og held fram. For dette er meir enn ein jobb for oss. Det driv oss alle, meiner Bøhler.
I løpet av 2023 har Sarepta fått 4,7 millionar kroner i tilskott frå Norsk filminstitutt, Østnorsk Filmsenter, Filminvest og Skattefunn.
– Kva har vore den aller største utfordringa dykkar med tanke på vekst og økonomi?
– Det har vore produksjonen. Å ha eit ambisiøst nok spel til å få inn nok midlar, og samtidig ikkje så ambisiøst at det tappar ressursane i selskapet. Det gjeld å vere smart.
Her ser du lista (obs: 15. oktober blei nokre av tala forskyve, som gav feil omsetning og resultat for eit par av selskapa. Feilen blei retta 17. oktober):
Saknar du eit selskap på lista? Gjerne gi eit pling i kommentarfeltet.
