Det er no to år sidan Horizon Forbidden West kom ut på PlayStation, og denne veka kan du endeleg utforske grøne åsar, skoddefylte dalar og snøkledde fjell som Aloy på PC.
Nixxes Software står for adaptasjonen. Dei har fått eit godt rykte på seg etter gode PC-versjonar av Spider-Man-spela og Ratchet & Clank: Rift Apart, og nye Horizon Forbidden West er ikkje noko unntak.
Dette er ein svært kompetent gjennomført PC-versjon. Me har dukka ned i dei ulike tekniske aspekta av spelet, så følg med.
Fiffig meny
Innstillingsmenyen er ofte ein treffande indikator på kvaliteten av ei PC-utgåve. Nixxes lar spelaren endre grafikkinnstillingar samtidig som du ser kva som skjer i spelet, slik at endringane er synlege.
Det er eit godt teikn.
Spelaren har mykje å leike seg med i menyen, og ein får dei obligatoriske innslaga som synsvinkeljustering, ulike typar kantutjamning og tilgang til oppskaleringsteknologiar som DLSS, FSR og XeSS.
Morosamt nok er det mogleg å tvinge breie sideforhold som 32:9 og 21:9 på ein vanleg 16:9-skjerm, som er ganske sjeldan kost.
Du kan berre endre oppdateringsfrekvens viss du set spelet i modusen for eksklusiv fullskjerm, ikkje fullskjerm. Sistnemnde er i praksis det som vanlegvis heiter «borderless fullscreen».
Eit minus, når ein først har eit så visuelt slåande spel, er at utviklaren ikkje har fått på plass strålesporing. Det ville løfta opplevinga eit lite hakk til.
Menyen for HUD-en i spelet er det store høgdepunktet, der ein kan skreddarsy kvar minste detalj. Det likar me.
Små forskjellar
Det er seks ulike førehandsvalde grafikkinnstillingsnivå. Forskjellen mellom Very High og High er liten, både med tanke på biletefrekvens og visuell kvalitet.
Me vil anbefale å skru opp synsvinkelen til maks med ein gong, for det er ein av PC-versjonens fremste styrkar samanlikna med konsoll.
Effekten på biletefrekvens er tilnærma null.
DLAA er den beste kantutjamninga med Nvidia-skjermkort, men eg brukte TAA gjennom mesteparten av spelet. Det gir eit par FPS ekstra.
Det ser ikkje ut som det er noko enkeltinnstilling som brukar uproporsjonelt mykje ressursar av datamaskinen, men du merkar liten visuell skilnad om du tar skuggekvalitet eller detaljnivå eit hakk ned, i alle fall ikkje i farta.
Dei vanlege styrkane
Det ser heller ikkje ut til å vere dei heilt store forskjellane mellom PC-utgåva og PlayStation 5-versjonen.
Testrigg
- Prosessor: Intel Core i9-13900k
- Kjølar: Asus Rog Strix LC II 360mm
- Hovudkort: Asus Rog Maximus Z790 Hero
- Lagring: Kioxia Exceria Pro 2 TB / W_D Black SN850X 2 TB / Kingston Fury Renegade 2 TB
- Straumforsyning: Asus Rog Thor 1200W Platinum II
- Kabinett: NZXT H7 Elite
- Operativsystem: Windows 11 Pro
Synsvinkel, ulåst biletefrekvens og oppskaleringstekonologiane er det store trekkplasteret på PC. Det gjeld stort sett alle konsoll-adaptasjonar.
PlayStation 5-spelet er låst til 30 FPS på maks kvalitet, og det å springe rundt med over 60 bilete i sekundet i 4K, kjenst enormt mykje betre ut.
Litt kjapp benchmarking viser at Nixxes tilsynelatande har gjort godt handverk med optimaliseringsarbeidet.
Me kosta støvet av RTX 3060 for å teste, som ifølgje Steam framleis er det mest brukte skjermkortet blant spelarar. RTX 4090 står i testriggen vår til vanleg, og er marknadens kraftigaste skjermkort.
| RTX 4090 (Very high) | Gjennomsnitt FPS | 1% minste-FPS gjennomsnitt |
| 1920x1080 | 124 | 85 |
| 2560x1440 | 108 | 77 |
| 3840x2160 | 75 | 59 |
Testen vår er gjennomført i eit av dei mest krevjande områda i første halvdel av spelet. Snittet ligg noko høgare i regionen rundt Meridian og grensa til Forbidden West.
Me har køyrt ein benchmark både gjennom ein by og ute i ope landskap. Biletefrekvensen er klart lågare når spelet teiknar fleire figurar på ein gong, og då spesielt i byane.
Me ser at RTX 4090 framleis leverer over 60 i nye spel, men her likte eg meg best på 1440p-skjermen min. Ein må ned på medium-nivået for grafikkinnstillingane før 4K-biletefrekvensen har skikkeleg flyt.
| RTX 4090 | Gjennomsnitt FPS | 1% minste-FPS gjennomsnitt |
| Very High (4K) | 75 | 59 |
| High (4K) | 77 | 60 |
| Medium (4K) | 94 | 70 |
| Low (4K) | 102 | 75 |
| Very low (4K) | 107 | 80 |
Spelet ser framleis svært lekkert ut sjølv nede på «medium»-nivå, og det er der ein ser biletefrekvensen verkeleg auke. «Low» går greitt, mens «Very Low» er Nintendo Switch-nivå.
| RTX 3060 12 GB (Very high) | Gjennomsnitt FPS | 1% minste-FPS gjennomsnitt |
| 1920x1080 | 55 | 40 |
| 2560x1440 | 42 | 32 |
| 3840x2160 | 25 | 22 |
Den gamle travaren RTX 3060 klarar ikkje 60 bilete i sekundet i 1080p. Spelet køyrer fint i medium og nedover, men skjermkortet begynner å vise alderen sin no.
Eg tippar skjermkort med mindre videominne vil slite meir. Då kan det vere lurt å skru ned detaljnivå og teksturkvaliteten.
Dynamisk oppløysing og DLSS kan løfte skjermkortet over 60 igjen. DLSS Quality gjer som vanleg ein glimrande jobb, men sjølv Balanced ser pent ut. Frame generation hjelper deg om du vil ha endå meir.
Konklusjon
Nixxes har levert ei jamt over strålande PC-oppleving. Det står i sterk kontrast til korleis mange spelarar har det i Dragon's Dogma 2 i skrivande stund, som så langt har blitt slakta på PC.
Horizon Forbidden West har dei fleste innstillingsvala me vil ha, det køyrer stabilt trass i den vakre grafikken og det med ei stort sett krasje- og feilfri oppleving.
Det er rett og slett lite å klage på.
