Lanseringa av Nvidia sin Blackwell-serie har vore ein svært, svært trong fødsel.
Me fekk vårt første RTX 5090-kort for omtrent ei veke sidan, som eigentleg skulle kome i posten i forkant av lansering. Slik er det av og til.
I mellomtida har eg som testar vore vitne til den totale fiaskoen rundt lanseringa:
- Svarte, blinkande skjermar
- Skjermkort som tar fyr, straumkontaktar som smeltar
- Galopperande prisar
- Skåltomme lagerhyller
- Skjermkort som rett og slett manglar delar av maskinvaren. Her har Nvidia sagt at dei skal erstatte kort med manglande ROP
- Skuffande yting
- Håplaus marknadsføring
Og denne lista kunne vore endå lengre.
Eigentleg var planen å publisere vår test av RTX 5090 i dag. Det kjem me ikkje til å gjere. Eg har hatt så mykje trøbbel med dette kortet, at eg er usikker på om dette berre er drivarkrøll eller om det faktisk er noko gale på maskinvarenivå med testeininga vår.
Eg kan gi eit lite innblikk i opplevinga mi. Kvar gong eg startar eit nytt spel, brukar skjermkortet fleire minutt før det leverer ytinga det eigentleg skal. Eg anar ikkje kva som er årsaka, for all data ser normal ut frå sensorane, men det gjer i alle fall at mange av testresultata er ubrukelege.
Lyden i Windows skurrar som eit uvêr kvar gong eg gjer noko på PCen. Det skjer ikkje like ofte med hovudtelefonar, men om eg koplar til ein høgtalar, kjem naboen bankande på døra og lurer på kva i alle dagar eg held på med.
Kvar gong eg startar datamaskinen min, frys systemet i fleire minutt. Aktivitetsloggen gir meg tusenvis av feilmeldingar i sekundet frå skjermkortet, og speler eg lenge nok, får eg blåskjerm.
I Forza Motorsport er min RTX 5090 opptil 30 prosent treigare enn forgjengar RTX 4090, og i fleire spel er bildeflyten forstyrra av tidvis skyhøg bildetid og irriterande hakking.
Då Kingdom Come: Deliverance II krasja for meg for tredje gongen i går, var ytinga halvert då eg starta det opp igjen.
Alle desse problema forsvinn når eg skiftar skjermkort.
Derfor ventar me med publisering.
For vår eigen del er det sjølvsagt kjekkast å vere klar innan sperrefristen, men no som me uansett er forseinka, kan me like greitt vente til Nvidia har undersøkt ein del av det me melder om.
Det er jo ingen som får tak i eit RTX 5090 no uansett.
Testeininga vår skal i teorien ha ein pris på 28 839 kroner, men kva det faktisk blir i nettbutikkane, har eg ikkje snøring på. Det gjer det også håplaust å sette ein karakter.
Det er leit at Nvidia har tulla det til så veldig for seg. AMD har i alle år hatt eit rykte for å levere dårlege drivarar, mens Nvidia har vore kjend for kvalitet.
RTX 50-lanseringa snur dette på hovudet. Ryktet deira er øydelagd.
Eg er ikkje ferdig med testinga mi med RTX 5090, men sjølv ein månad etter lansering kan eg framleis støtte meg på anmeldarkorpset her. Dette er ikkje eit godt kjøp.
Skjermkortet er heller ikkje ferdig. Betre drivarar, nye oppdateringar i spel og BIOS-oppdateringar vil sikkert fikse det meste etter kvart. Men me er ikkje der enno.
RTX 5090 følast som ei slags Early Access-lansering av eit skjermkort.
Tapte du dei første slaga om å få bestille RTX 5090, så bør du ikkje bekymre deg for mykje for det. For her bør ein vente. Lenge.
