Dei siste åra har vore blytunge for den internasjonale spelbransjen.
Etter at den enorme etterspurnaden for innhald under pandemien dabba av, har titusenvis av spelutviklarar måtte sjå etter nye jobbar.
2024 har kanskje vore det aller tøffaste året.
Her i Noreg har Gamer.no blant anna dekka nedbemanningar hos Dirtybit og Snowcastle Games, og no kan me melde at Rain i Bergen har delvis permittert fleire av sine utviklarar.
– Blitt vanskelegare
Peter Wingaard Meldahl er største aksjonær, dagleg leiar og styreleiar hos Rain AS.
Han fortel at dei er i sluttfasen av permitteringane, og at det ikkje er noko stor dramatikk bak valet om å permittere.
«Eit par» av dei 13 personane i Rain har vore delvis permitterte, seier Meldahl.
– Det har vore ein liten slump. Me gjekk frå to aktive prosjekt til eitt, og såg som alle andre korleis det er blitt vanskelegare å skape interesse, seier Meldahl.
Han opplever at både investorar og utgivarar held svært godt på pengesekkane. Det er verre enn på minst ti år, seier han.
Hadde ikkje råd til løn
Rain har vore ute ei vinternatt før.
– Tidlegare, fleire gongar, har me måtte avslutte prosjekt utan å betale løn på slutten av produksjonen, fortel Meldahl.
Det skjedde både for Mesmer (2020) og Teslagrad (2013).
– Me har lært sidan den gong. Ting er annleis i dag, og ein periode med delvis permittering var det einaste som skulle til.
Rain har gått med overskott i fleire år. Dei har ein relativt solid økonomi for å vere eit utviklarselskap, og Meldahl trur dei vil ligge omtrent rundt nullen i årsresultatet for 2024.
I 2023 lanserte Rain både ein nyversjon av Teslagrad, nye Teslagrad 2 og Girl Genius. Året enda på ei omsetning på i underkant av ti millionar kroner og eit overskott på 525 000 kroner.
Omsetninga vil bli lågare i 2024 – i og med at dei ikkje har lansert noko nytt.
Spennande nyheiter på horisonten
Rain jobbar med eit uannonsert, nytt prosjekt som skal avdukast i nær framtid.
– Me er veldig fornøgde og stolte av prosjektet, og eg gleder meg til å vise det fram, seier Meldahl.
Dei er ikkje heilt klare for å avsløre kva det går i enno.
– Me har kome langt i prosjektet, men de må vente litt enno.
