I fjor mista Marie Vilain (30) jobben hos norske Snowcastle Games under ei nedbemanning.
Nærmare 34.000 spelutviklarar har lidd same skjebne sidan 2022. Vilain ville bli buande i Oslo, og har vore på desperat jobbjakt det siste året.
Ho meiner å ha søkt på rundt 90 jobbar. 40 av dei skreiv ho gjennomarbeidde søknadar til, resten var kortare prosessar gjennom LinkedIn.
– Det var tøft. Det verste var då eg kom så langt i prosessen at eg kjende på håp, men dei enda med å velje nokon andre, fortel ho.
– Fantastisk følelse
Tilbakemeldinga ho fekk oftast, var at ho mangla erfaring frå storspel.
Vilain har bakgrunn frå indieutviklarane Snowcastle og Krillbite.
Ho har vore med som konsulent på nokre enkeltprosjekt i 2024, men har først og fremst måtte leve på oppsparte midlar.
– Eg er heldig som har støtte frå familien, og kan ikkje førestille meg kor stressande dette hadde vore utan. Eg brukte opp mykje av sparepengane mine, men no bygger eg dei sakte opp att, fortel ho.
I november fekk ho endeleg beskjeden ho venta på. Ny jobb. Vilain arbeidar no som produsent for den tyske spelutviklaren Maschinen-Mensch.
Ho er letta.
– Det var ein fantastisk følelse. Då dei valde meg, var det ei stor lette. Eg var også glad for at dette var eit av selskapa eg verkeleg kunne tenkt meg å jobbe for.
Fryktar ny nedbemanning
Vilain jobbar med prosjektadministrasjon. 26. mars lanserte selskapet spelet Mother Machine, som Vilain har vore tett på utviklinga av.
Ho har jobba fulltid, men er på frilanskontrakt fram til sommaren.
– Eg håper verkeleg at eg får fortsette, men det kjem an på den økonomiske situasjonen vår og korleis det går med spelet. Det ser ikkje kjempelyst ut, men alt kan skje, seier Vilain.
Ho syns gjengen i Maschinen-Mensch er kjekke og dyktige folk, men legg ikkje skjul på at det er tøffe tider for selskapet.
– Eg er nok ikkje heilt trygg frå ein ny nedbemanningsrunde. Det var tre personar som ikkje fekk fornya kontrakten sin denne månaden, så eg kryssar fingrane for at Mother Machine sel godt.
Tar oppgjer med AAA
Dataspelnæringa har vore i enorm vekst gjennom fleire tiår.
Den aller største interessa såg me under pandemien, då folk leita etter nye tidsfordriv.
Etter 2021 har veksten stoppa opp. Både store og små spelselskap har kutta til beinet, og marknaden har vore gjennom ein større korreksjon.
2024 blei eit endå mørkare år enn 2023. Rundt 15.000 mista jobben.
– Eg trudde ikkje krisen kom til å vare så lenge. Det er skremmande å sjå alle desse utviklarselskapa falle, nokon av dei har eg til og med søkt hos, eller eg har vener som jobbar der, seier Vilain.
Ho er sterkt kritisk til makta blant dei store utviklarselskapa.
Vilain meiner det er viktig at fleire organiserer seg i fagforeiningar, og at ein treng ein opnare debatt rundt arbeidsforholda og nedbemanningane i bransjen.
– Spel er laga av menneske, ikkje KI eller magi, og viss forretningstypar på toppen meiner at vala deira ikkje får konsekvensar, tar dei heilt feil.
Pengestraumane har tørka inn
Vilain har leika med tanken om å lage sitt eige spel.
– Det har eg prata ofte om. Med både vener, tidlegare kollegaer og andre utviklarar, men problemet er det same; me treng finansiering og det finst knapt.
Ho opplever at utgivarane og investorane ikkje vil ta risiko på små prosjekt.
– Me har framleis game jams og små, morosame prosjekt for vår eigen del. Men no er det tilsynelatande ingen måte å nå kommersielle ambisjonar, seier ho.
Vilain etterlyser også fleire bransjeinterne samlingar i Noreg.
– Eg jobbar for å få til noko nytt der. Her ligg me godt an, men finansiering er jo det vanskelege. Eg håper det blir enklare etter kvart som spelbransjen begynner å løfte seg i det komande året, seier ho håpefullt.
