I dag blei endeleg den oppussa versjonen av Grand Theft Auto V lansert på PlayStation 4 og Xbox One. Mange av spelarane som har venta på denne utgåva av spelet har runda Grand Theft Auto V allereie, og difor har Rockstar Games tilrettelagt for at vi skal kunne ta med oss all progresjonen inn i den nye versjonen av spelet.
Teori er alltid lettare enn praksis, og som med fleire andre spel den siste tida har ikkje lanseringa av Grand Theft Auto V gått heilt knirkefritt. Ei rekke spelarar har i følgje Eurogamer ikkje fått hente fram sine gamle karakterar. Dette ser i hovudsak ut til å gjelde spelarar som ikkje har spelt fleirspelarmodusen GTA Online på over eit år. I tillegg har ei rekke PlayStation 4-spelarar støtt på vanskar med å laste ned ei oppdatering til spelet. Denne er påkrevd for å få overføre framgangen din.
Rockstar Games er på saka, og om du går til kundestøtteseksjonen på nettsidene deira kan du skrive deg opp på ei mailingliste for å få beskjed når situasjonen er fiksa.
Vellukka oppussing
Sjølv om ikkje alle har fått ein like god start i nye Grand Theft Auto V, var vi svært nøgde med Rockstar Games sitt oppussingsprosjekt:
«No som Rockstar byr på meir innhald og ei langt penare innpakning er det lett å la seg freiste. Til tross for oppgradert grafikk er den største grunnen til å booke ein returbillett moglegheita til å spele det i førsteperson. Plutselig framstår det elles så velkjende universet som nytt og friskt. Og det er vel akkurat det som er poenget med å pusse opp. »
Ved sidan av Grand Theft Auto V, har storspelet Assassin's Creed Unity og samlepakka Halo: Master Chief Collection hatt utfordrande lanseringar dei siste vekene. Er det på tide at utviklarane tek seg litt betre tid med finpussen?
