Red Dead Redemption – PC

14 år, fem månadar og 13 dagar har gått sidan Red Dead Redemption lanserte på Xbox 360 og PlayStation 3.

Det er også snart fem år sidan oppfølgaren kom til PC, og 29. oktober kom endeleg det første spelet til PC.

John Marston er igjen klar for å ri inn i solnedgangen gjennom eit teppe av krutrøyk, men denne gongen er dukkemeisteren hans utstyrt med mus og tastatur.

Kva har utviklarane faktisk endra med spelet? Korleis køyrer det, og følast det heilt utdatert?

Me undersøker.

Overraskande bra

For ein knapp månad sidan fekk PlayStation 5 og Xbox Series-konsollane støtte for 60 bilde i sekundet i Red Dead Redemption.

PC-versjonen har ei sperre på 144 bilde i sekundet.

Allereie same dag som spelet lanserte på PC, blei det publisert ein modifikasjon som fjerna sperra.

Spelet ber naturlegvis preg av å vere laga på 2000-talet. Eg merkar tidvis at eg må kjempe mot spelets kontrollmekanismar, som nok er der alderen gjer seg til kjenne i størst grad. Det er også eit par småfeil her og der, til dømes ved at figurar set seg fast i terrenget og eg må dytte borti dei med Marston.

Likevel held Red Dead Redemption seg overraskande godt.

Sjølv om det visuelle ikkje akkurat har 2024-standard, gjer både spelmekanismane, forteljinga og stemninga at eg kjem til å pløye gjennom heile spelet på nytt.

Det er også noko heilt anna å oppleve Red Dead Redemption i 4K og høg bildefrekvens – spesielt for oss med ein allergi mot skytespel i 30 «FPS».

Heilt grei PC-versjon

Men sjølv om spelet har tolt tidas tann langt betre enn mange andre spel frå rundt 2010, har ikkje utviklar Double Eleven gjort all verda med det visuelle.

Etter 14 år kunne dei like greitt pussa det opp skikkeleg, tenkjer eg.

Dei største oppgraderingane er å opne for høgare oppløysing og bildefrekvens, støtte for KI-oppskaleringsteknikkane FSR og DLSS, HDR, ultrabreie skjermar og «frame generation».

Elles er grafikkmenyen heilt ok.

Det verkar som DLSS/FSR har litt trøbbel med brukargrensesnittet, som kan vere irriterande. Eg har uansett køyrt utan oppskalering.

Når det kjem til ytinga, vil dei aller fleste skjermkort frå dei siste generasjonane takle spelet fint.

Vår RTX 4090 oppnår i snitt 167 bilde i sekundet i 4K, då med alt på høgaste innstillingsnivå. Testen blei gjort i det mest krevjande området eg fann.

Tala er ikkje veldig imponerande, men det betyr at veldig mange vil nå 144-grensa ved hjelp av KI-oppskalering i 4K.

Skuggekvaliteten ser ut til å vere den mest krevjande innstillinga, så juster ned den om du treng høgare bildefrekvens.

Konklusjon

Skytespel krev presisjon. Difor nyt ein godt av høg bildefrekvens og kombinasjonen av mus og tastatur.

Berre dette gjer at Red Dead Redemption no er best å spele på PC. Spelet har også heldt seg betre enn eg forventa, som er kjekt for alle med spel-PC på rommet.

Likvel er det noko som legg ein betydeleg dempar på opplevinga.

Nemleg prislappen.

Dei tekniske gjennomgangane våre handlar sjeldan om kostnad, men her må du altså ut med 600 kroner for eit 14 år gammalt spel som utviklarane trass alt har gjort ganske lite med.

Det hadde vore noko anna om spelet hadde vore bygd opp i ein ny grafikkmotor, men det er vanskeleg å ikkje reagere når ein i skrivande stund får oppfølgaren frå 2019 til 311 kroner på Steam.

Så, har du venta 14 år og fem månadar med å spele dette på PC, kan du sikkert vente ei stund til for ein rabattert pris.

Det ville eg gjort.