OPPDATERING: Dei norske prisane er klare. RTX 5090 kostar 28 839 kroner, RTX 5080 kostar 14 500 kroner, RTX 5070 Ti kostar 10 859 kroner og RTX 5070 kostar 7969 kroner.
Original sak følger:
Det er ofte noko spennande på veg når Nvidia-toppsjef Jen-Hsun «Jensen» Huang dukkar opp på scenen i skinnjakke.
Natt til tysdag tok Huang hundretusenvis gjennom den nye lanseringa av 50-serien av skjermkort, iført det som må vere ei slags slangeskinnsjakke for anleidninga.
Blackwell-arkitekturen kjem no isnart. RTX 5090 og RTX 5080 er først ute 30. januar, mens RTX 5070 og RTX 5070 Ti kjem i februar.
– Skjermkortet er eit monster, sa Huang på presentasjonen.
Heftig generasjonshopp?
I 2022 lanserte flaggskipet RTX 4090 til 1600 dollar. Den nye toppmodellen får ein prislapp på 2000 dollar, men skal ha dobbelt så høg yting som forgjengaren.
– Me produserer i veldig stor skala, og skjermkortet blir tilgjengeleg i januar, sa Huang.
RTX 5080 startar på 1000 dollar, RTX 5070 Ti 750 dollar og RTX 5070 til 550 dollar. Dei norske prisane var ikkje tilgjengelege natt til tysdag.
Nvidia lokka tidleg med RTX 4090-yting for RTX 5070, som om det stemmer, vil vere eit hopp i yting me ikkje har sett på mange generasjonar.
Bildet over viser at Nvidia baserer seg på KI-oppskalering og bildegenerering for påstandane, så det er altfor tidleg å seie kva ein faktisk kan forvente.
Spesifikasjonane ser du i tabellen under, som viser at lekkasjane stort sett stemmer.
| RTX 5090 | RTX 5080 | RTX 5070 Ti | RTX 5070 | RTX 4090 | |
| Arkitektur | Blackwell | Blackwell | Blackwell | Blackwell | Lovelace |
| CUDA-kjernar | 21760 | 10752 | 8960 | 6144 | 16384 |
| AI-TOPS | 3352 | 1801 | 1406 | 988 | 1321 |
| Tensor-kjernar | - | - | - | - | - |
| Strålesporingskjernar | - | - | - | - | - |
| Videominne | 32 GB GDDR7 | 16 GB GDDR7 | 16 GB GDDR7 | 12 GB HDDR7 | 24 GB GDDR6X |
| Minnebandbreidde | 1792 GB/s | 960 GB/s | 896 GB/s | 672 GB/s | 1008 GB/s |
| TDP | 575W | 360W | 300W | 250W | 450W |
| Lansering | 30. januar | 30. januar | Februar | Februar | 2022 |
Ny generasjon oppskalering
50-serien kjem med DLSS 4, Nvidia sin teknologi for KI-oppskalering.
I ein kort video frå Cyberpunk 2077 ser me bildefrekvensen hoppe frå 20-talet til over 200 med og utan oppskalering. RTX 5090 slit altså framleis med innstillingsnivået på maks og RT Overdrive.
DLSS 4 kjem saman med ein ny generasjon bildegenerering og Nvidia Reflex.
Dei nye skjermkorta kjem med femte generasjon av Tensor-kjernar (KI-kjernar), og får fjerde generasjon strålesporingskjernar.
Nvidia kjem med eigne Founder's Edition-kjølarar, mens produsentar som Asus, Gainward, MSI, Zotac og liknande lagar eigne versjonar av skjermkortet.
Berbare i mars
Huang viste også fram nye berbare, og lova 4090-yting i maskinar med RTX 5070 til 1300 dollar.
Toppsjefen køyrte hardt på kunstig intelligens, og det skal vere grunnen til dei saftige hoppa i yting. Med andre ord bør ein vente til det finst skikkelege testar av ytinga.
– Framtida av datagrafikk er nevralrendering, sa Huang.
