Intel planlegg å kutte ti milliardar dollar i 2025. Brorparten av kutta kjem allereie i år.
– Dette er ein utruleg vanskeleg dag for Intel, for me gjer nokre av dei største endringane i vår historie, skreiv Gelsinger i eit brev til dei tilsette.
Intel forventa langt større inntektsvekst enn dei har sett i det siste. Gelsinger skriv om låge marginar og for høge kostnadar.
Han omtalar kutta «som det vanskelegaste han har gjort i sin karriere».
Aksjeprisen til Intel gjekk i kjellaren etter nyheita. Frå 31. juli til 2. august blei prisen redusert med nærmare 30 prosent.
Intel har om lag 130 000 tilsette verda rundt. Dei er eit av verdas største teknologiselskap, og har vore ein leiande produsent av mikroprosessorar sidan dei blei stifta i 1968.
Den siste tida har dei også møtt krass kritikk for dei to siste generasjonane av prosessorar.
Brukarar har meld om ustabilitet med 13. og 14. generasjon prosessorar (Raptor Lake) i lang tid, og i slutten av juli stadfesta Intel ein del av problema.
Fredag annonserte Intel at dei vil utvide garantien for utvalde Raptor Lake-prosessorar med to år.
Intel har så langt ikkje gått ut med serienummer på produkta ramma av feil. Det er mykje spekulasjon rundt saka på sosiale medium.
