Pillars of Eternity er eit av årets mest etterlengta rollespel. Spelet som lanserast neste veka blei finansiert gjenom Kickstarter etter løfte om å lage ein arvtakar til dei klassiske Infinity Engine-rollespela frå 90-talet. Utviklarstaben hos Obsidian Entertainment husar mange veteranar som tidlegare jobba med spel som Baldur's Gate og Icewind Dale, og dei siste åra har dei brukt på å utvikle eit spel i same gate som desse rollespela.
Sjølv om vi enno må vente ei god veke på å få kaste oss ut i Obsidians nye rollespelverd, har utviklarane planane klare for framtida. Under ein Reddit AMA har Obsidian-produsent Adam Brennecke avslørt at studioet har byrja arbeidet med ei utviding til Pillars of Eternity.
Like stort som Tales of the Sword Coast
Brennecke var sparsam med detaljane, men ut frå det han har sagt ser det ut til å bli eit omfattane tillegg til hovudspelet:
«Vi vil lage ei utviding som i storleik er omlag like omfattande som Baldur's Gate-utvidinga Tales of the Sword Coast. Sidan vi er tidleg i utviklingsprosessen vil eg ikkje seie mykje, men vi har eit lite team som jobbar med å lage nye områder, medan resten av teamet er fokusert på å gjere ferdig Pillars of Eternity. Vi vil fortelje meir om utvidinga i dei komande månadane.»
Den komande utvidinga til Pillars of Eternity er ikkje den einaste framtidsplanane Obsidian har for spelet. Studioet har allereie ytra at dei vil gå i gong med arbeidet med ein oppfølgjar. Som med Pillars of Eternity er det godt mogleg oppfølgjaren vil bli finansiert gjennom Kickstarter.
Vi tok ein kikk på Pillars of Eternity i fjor og likte svært godt det vi fekk sjå.
