For omlag ein månad sidan fortalde den japanske utviklaren Atlus at dei ville kome med ei stor kunngjering i dag 24. november. Etter ei 72 timar lang nedtelling som gradvis avslørte små hint om kva som var i gjere var det omsider tid for å avsløre kva dei har jobba med den siste tide.
Dei som følgde med på nedtellinga fekk løn for tolmodet sidan Atlus omsider kunngjorde Persona 5 for PlayStation 3. Den einaste informasjonen dei har gjeve om spelet er at det blir regissert av Katsura Hashino som tidlegare har stått bak Persona 3, Persona 4 og Shin Megami Tensei: Lucifer's Call. Spelet vil bli lansert i Japan neste vinter. Ingen skjermbilete blei vist fram.
Fire ny Persona-spel
Persona 5 var ikkje det einaste Persona-spelet som blei kunngjort i dag. I tillegg til det femte nummererte spelet i rollespelserien starta Atlus med å vise fram tre andre spel som svært få kunne forutsjå.
Det første spelet som blei vist fram er Persona Q: Shadow of the Labyrinth for 3DS. I dette spelet møter vi personar frå både Persona 3 og Persona 4, og i staden for den visuelle stilen vi kjenner frå andre Persona-spel, blir dette spelet presentert med figurar i Chibi-stil. Det vil seie lettare deformerte figurar som ser meir ut som born enn som vaksne folk. Spelet blir regissert av Etrian Odyssey-regissør Daisuke Kaneda.
Etter denne kunngjeringa viste Atlus fram Persona 4: Ultimate Duplex Hold. Dette spelet er ein oppfølgjar til slåssespelet Persona 4: Arena som blei lansert i Europa tidlegare i år.
Den mest uventa kunngjeringa var utvilsamt PS Vita-spelet Persona 4: Dancing All Night. Som du kanskje ser av namnet er ikkje dette eit vanleg Persona-spel. Dette blir eit dansespel servert av Hatsune Miku-utviklarane hos Dingo.
Om nokon av desse spela kjem til Europa veit vi ingenting om heilt enno.
