Titanfall er blant dei mest omtala skytespela i nyare tid. Det har blitt utvikla av Respawn som består av fleire veteranar frå Infinity Ward, studioet som skapte den vanvittig populære Call of Duty-serien. Titanfall bryt med den moderne krigføringa i Activisions storserie, og satsar i staden på ein framtidsvisjon der parkour og digre robotar blir viktige delar av spaninga.
Spelet er utvikla for PC, Xbox One og Xbox 360, men sidan Xbox One ikkje lanserast i Noreg før 26. september, er Xbox 360 det naturlege valet for spelarar utan kraftige PC-ar. Xbox 360-lanseringa har lenge vore sett til eit par veker etter lanseringa på PC og Xbox One, men i dag kom meldinga om at Xbox 360-versjonen er utsett nok ein gong. Den nye datoen er 11. april.
Treng meir tid
Sjølv om det er Respawn som står bak utviklinga av Titanfall på Xbox One og PC, er det studioet Bluepoint Games som står for grovarbeidet med Xbox 360-versjonen. Patrick Söderlund frå EA har i eit blogginnlegg i dag fortalt at dei treng hakket meir tid for å få alt skikkeleg på plass.
Bluepoint Games er ingen nykomar når det gjeld i å handtere andre studio sine spel, og har tidlegare stått for HD-utgåvene av speriar som God of War, Ico og Shadow of the Colossus, samt Metal Gear Solid.
Espen stod for vår vurdering av PC-versjonen av Titanfall. Han meinte spelet er skytespelas nye konge, og gav det ni av ti poeng:
«Titanfall er ei intens speloppleving som set spelarane i førarsetet og klampen i bånn frå første stund. Kampane føregår i eit stort og tidvis fargerikt univers, der alt frå skytekjensla til måten ein beveger seg på er gjennomført med eleganse og presisjon. Meir enn noko anna er det berre moro å spele Titanfall.»
Om du treng litt skyteaction på Xbox 360 før Titanfall blir tilgjengeleg kan du sjekke ut vår vurdering av det ferskaste Call of Duty-spelet.
