Som om gjengen i Jackass ikkje har mørbanka seg sjølv nok gjennom MTV-serien og to filmar, har dei no bestemt seg for at du skal få gjere det i staden. I Jackass: The Game vil du få møte dei sjølvtorturerande villmennene, og sende dei gjennom ei lang rekke med halsbrekkande stunts.

I motsetning til TV-serien der produsentane har vore nødt til å ta stilling til at menneskekroppen ikkje tåler ubegrensa med lemlesting, tek spelet alt mykje lengre. Utviklarane har tatt utgongspunkt i det vi har sett i serien, men seier spelet er ein ekstrem versjon av dei ville påfunna vi har sett før.

Du kan til dømes sleppe dei ned frå ein 50-etasjers bygning, berre for å lande i avføringa til ein elefant. Nokre døme på andre søndagsturar du kan la Jackass-gjengen ta del i, er å køyre over hustak i tivolibilar, tandemsykling gjennom eit anleggsområde, eller du kan sende dei rullande ned gatene i San Francisco i ei tønne. Til saman vil spelet innehalde 35 forskjellige stunts.

Spelet tar i bruk dynamisk fysikk og filledokke-teknologi, noko som vil gjere kvart stunt unikt. Som i TV-serien går ikkje ting alltid som planlagt heller. Om noko går skeis, kan du alltids velje å trekke deg, noko som vil sende deg ut i ein filledokke-modus. Då vil du kunne halde fram med å håve inn poeng for kor mykje skade deltakaren blir påført, og desto større skade personane får, desto meir poeng får du. Spelet har eit detaljert skadesystem som held oversikt av alt frå knuste bein til sprukken milt.

Dei forskjellige "aktørane" i Jackass er involverte i produksjonen, og har blant anna kome med idear dei har hatt, men som aldri blei brukt i serien. I tillegg har dei medverka ved å gje sine eigne stemmer til dei digitale versjonane av seg sjølv. Steve-O seier at han håpar spelet blir like elendig som filmane.

Jackass: The Game kjem til PlayStation 2, PSP og Nintendo DS til hausten.