God of War Ragnarök – PC

Eg har sakna Kratos og Atreus. Dei nye God of War-spela er blitt ein av mine soleklare favorittseriar, og denne veka er Ragnarok lansert i full master race-modus på PC.

Me har pløya gjennom dei første 15 timane på utkikk etter teknisk kluss og surr, og heldigvis er det ikkje all verda å finne.

Spelet har fått ein drøss med negative tilbakemeldingar på Steam, men det skuldast først og fremst det same problemet som Sony har hatt sidan Helldivers II – nemleg at du treng Sony-konto på PC.

For oss her i Noreg er ikkje det noko problem, og du treng berre å logge inn éin gong for å få tilgang på prestasjonar og PlayStation-trofe.

Ikkje noko å stresse for, altså.

Best på PC – sjølvsagt

Høgare oppløysing, ulåst biletefrekvens, støtte for ultrabreie sideforhold og ein del nye grafikkalternativ er blant trekkplastera for PC-versjonen.

Visuelt sett er det penare enn PlayStation 5-versjonen, men det er først og fremst punkta over som gjer dette til den beste utgåva av spelet. Eg mistenker at Sony bremser litt for å opne for ei PS5 Pro-oppussing etter kvart.

Du får – som på PS5 – ein heil drøss med ulike måtar å tilpasse spelet gjennom menyane, og også moglegheita til å justere ned kor ofte kompanjongane dine kjem med tips om du er treig i gåteløysinga.

Jetpack Interactive står bak PC-versjonen. Dei laga også PC-utgåva av det første God of War-spelet i den nye serien, som var aldeles strålande.

God of War Ragnarök er ikkje noko unntak.

Få feil

Optimaliseringsarbeidet i spelet imponerer.

Det har kome nokre meldingar om at det ikkje er mogleg å starte spelet om du har eit skjermkort med mindre enn 6 GB videominne, men eldre kort kan likevel køyre det med litt innstillingstriksing og ein modifikasjon.

Så langt er det også nokre få postar på sosiale medium om problem med yting.

Eg har spurta meg gjennom første delen av spelet, og er kome til slutten av Vanaheim. På vegen har eg stort sett brukt eit Nvidia RTX 4090.

Dei einaste tekniske problema eg har vore borti, er at ikona ikkje ser særleg bra ut i anna enn 4K og litt hakking ved nokre ytst få stadar dersom spelet køyrer i nokre timar.

Det er bagatellar.

4090-en leverer jamt over svært høg biletefrekvens i 4K:

Desse målingane er tatt i Svartalvheim, som er ganske representativt for dei første 10–15 timane.

Unntaket er områda rundt Yggdrasil, der biletefrekvensen kan falle ned på 50–60 i 4K. Det tippar eg blir nappa ut etter ei oppdatering eller to.

Nydeleg spel

Grafikkmenyen har ein del snacks å leike med. Strålesporing og ein slider for synsvinkel er sakna, men elles har du det meste du treng.

Det er snart to år sidan God of War Ragnarok kom ut. Sjølv om grafikken ikkje er heilt 2024-standard på PC, er det eit nydeleg spel.

Vanlegvis anbefaler me eit sett av innstillingar du bør skru ned for å få litt meir yting utan å ofre særleg med visuell kvalitet, men forskjellane både når det gjeld utsjånad og yting er ganske små.

Det er litt keisamt for dei med kraftige skjermkort, men ein fordel for dei med rimelegare kort.

Skjermkortet kjem til å vere flaskehalsen omtrent uansett kva du har i maskinen, og då er det greitt at low-innstillingane ikkje er heilt 2008.

Du skal følge godt med for å merke noko visuell forskjell på High og Ultra. High er slik sett gullhårsonen her.

Det verkar som skuggekvalitet, modellkvalitet og refleksjonar et mest av biletefrekvensen blant innstillingane opp frå High til Ultra, så du kan begynne å skru ned dei om du vil halde mest mogleg på ultra og likevel løfte biletefrekvensen litt.

Forskjellane mellom ultra og low er tidvis ganske små. Her ser biletet svært likt ut, og det er berre 15 FPS som skil dei to.

Kva innstillingar som krev mest, vil variere litt frå kva område du er i.

Til dømes har Nivlheim ein del meir tåke og skodde enn andre område, som gjer at «atmospherics»-innstillinga er meir krevjande der.

Gammal travar held stand

RTX 3060 er framleis det mest populære skjermkortet ifølge Steam sin eigen statistikk, og det er meir enn kraftig nok for å spele God of War på dei høgare innstillingsnivåa:

Skru ned innstillingane litt, så ligg du godt over 60 bilete i sekundet gjennom heile spelet med ein del eldre, rimelegare skjermkort.

Frame generation vil sjølvsagt løfte biletefrekvensen betydeleg om du har eit skjermkort frå siste generasjon, men Nvidia-brukarar må førebels nøye seg med AMD sin frame generation her.

Konklusjon

Eg er fullstendig hekta på God of War Ragnarök, sjølv om det er eit knapt år sidan eg spelte gjennom det på PS5 sist.

Det er ein stor fordel med ulåst biletefrekvens i actionspel som dette, og det er noko heilt anna å oppleve dei ni rika i 100–150 FPS i 4K enn det var i 60 FPS og 1440p på PS5.

Eg skulle ønske utviklarane hadde gjort det vesle ekstra for å løfte den grafiske kvaliteten, men Ragnarök er framleis eit vakkert eventyr.

Dette er eit av dei beste actionrollespela nokosinne laga, og dette er den beste versjonen av spelet.

Så kva er det du ventar på?