Det siste tiåret har utviklinga av stadig større og raskare gamingskjermar verkeleg tatt fart. For entusiasten har 1920x1080-oppløysinga vore utdatert i mange år.

2560x1440 og 3840x2160 (4K) har tatt meir og meir over, og oppdateringsfrekvensane blir stadig høgare.

Marknaden har fått dei første skjermane på 500 hertz (1080p), og det har dukka opp ein 1440p-skjerm frå Asus med oppdateringsfrekvens på 360 hertz. Sistnemnde har stått på underteikna sin pult i nokre månadar.

Den taiwanske produsenten lovar at Asus ROG Swift PG27AQN kan gjere deg tre prosent meir treffsikker i spel.

Det høyrest ut som PR-vas, men er det eit snev av sanning her? Me har brukt nokre månadar på å undersøke.

Vanskeleg å etterprøve

Påstanden frå Asus er basert på at eventuelle kjøparar har spelt skytespel i 1920x1080 med 360 hertz oppdateringsfrekvens.

Det passar for så vidt godt på meg. Dei siste åra har ein 1080p-skjerm med oppdateringsfrekvens på 240hz vore min trufaste kompanjong i alt av konkurransespel. Forskjellen til 360hz er trass alt ikkje all verda.

Så har det seg slik at mesteparten av tida mi framfor maskinen, når eg ikkje skriv til dykk, går med til nettopp skytespel.

Eg har prøvd å utfordre påstanden til Asus med å teste treffsikkerheita mi i både KovaaK's og modifiserte kart i Overwatch, men tre prosent skilnad er nok godt innanfor feilmarginen vår.

Det å hoppe mellom 1080p/240hz og 1440p/360hz endrar treffsikkerheita mi mest fordi det er uvant å skifte oppløysing. Det gjeld både når eg går frå den eine skjermen til den andre, og når eg skiftar oppløysing på Asus-skjermen.

Resultata har stort sett vore i 360hz-modusen sin favør, men skilnadane er så små at det må vere tilfelle.

Difor må me, som vanleg i alle våre testar, basere oss på subjektive vurderingar. Nemleg korleis skjermen følast.

Gjer det kjekkare å spele

I skrivande stund kostar Asus ROG Swift PG27AQN 15 000 kroner. Den har faktisk blitt dyrare sidan lanseringa i fjor vinter, moglegvis på grunn av søkkande kronekurs.

Det er viktig å understreke at det er lite vits i å kjøpe ein skjerm som denne utan ein svært kraftig PC, ei djup lommebok og ei over gjennomsnittet interesse for å redusere forseinking i konkurransespel til det aller minste.

Ingen treng ein skjerm til 15 000 kroner, men det er kjekt å ha viss ein har råd.

Det er ingen overrasking at eg oppfattar dette som ein betre skjerm enn min gamle travar. Skilnaden er ikkje verd 10 000 kroner meir, men eg hadde ikkje forventa at kjensla av å spele skulle bli så mykje betre som ho faktisk blei.

Eg føler at eg treff fleire fiendar enn før, og eg føler at eg har blitt betre i spel takka vere denne skjermen. Det verkar i alle fall tungt å skifte til noko anna.

For første gong på lenge har eg kome meg opp i Diamond i Overwatch igjen. Det trur eg har litt med denne skjermen å gjere. Kanskje ikkje fordi eg automatisk blir meir treffsikker, men fordi det er kjekkare å spele med dette vedunderet på pulten.

Treff blink på det meste

Forskjellen frå 1080p/240hz opp til 1440p/360hz oppfattast naturleg nok stor.

No speler eg mykje i 1440p/144hz til vanleg på ein annan skjerm, men eg har ikkje vore borti ein gamingskjerm som tikkar så mange boksar på likt som denne.

Fargane er imponerande nøyaktige, nok til at eg sannsynlegvis brukar denne til bilete- og videoredigering framover. Det gjeld sjølv før ein kalibrerer fargane.

Forseinkinga er ikkje-eksisterande, HDR-modusen er den beste eg har sett på ein gamingskjerm, og skjermen er lys nok (500 nits maks) til at eg må slå ned lysstyrken når eg speler med HDR.

Det er nettopp summen av alt som gjer PG27AQN så attraktiv i mine auge.

Kjensla av å spele skytespel på skjermen er fantastisk. Eit lite atterhald her er at me ikkje har testa OLED-skjermar enno, men eg har aldri prøvd ein gamingskjerm som eg har hatt så lyst til å kjøpe sjølv før.

Skuffande kontrastnivå

Det største minuset er openbert prisen. Ny teknologi kostar flesk, og det vil ta ei stund før ein får liknande produkt til eit meir leveleg prisnivå.

PG27AQN er heller ikkje perfekt.

Eg er mest skuffa over kontrastnivået og djupna på svartfargen til skjermen. Det skuldast nok ei svak implementering av «local dimming», som igjen kan føre til blooming rundt lyse objekt.

Sjølv om dei aller fleste ikkje kjem til å legge særleg merke til dette, drar det karakteren ned eit lite hakk.

Elles er det lite å pirke i. Brukaropplevinga er strålande takka vere styrespaken på høgresida av skjermen, og innstillingsmenyen er intuitiv og oversiktleg.

Asus har krydra til skjermen med funksjonar som ein innebygd målar for biletefrekvens, ein forseinkingsmålar frå Nvidia og eit eige sikte du kan plassere midt på skjermen for å få ein liten fordel når du spring rundt med skarpskyttarrifle i skytespel.

Konklusjon

Asus ROG Swift PG27AQN er utan tvil den beste gamingskjermen me har testa.

Den er latterleg dyr, og du bør absolutt ikkje kjøpe ein slik skjerm enno om du ikkje har frykteleg lyst, men det er flott at skjermteknologi har kome så langt som han har.

Summen av delane er det som gjer skjermen til ein hit. Den låge forseinkinga, dei imponerande nøyaktige fargane, ei relativt god implementering av HDR, støtte for G-Sync, Freesync og omtrent alt av skjermteknologi du kan tenke deg, er ein uslåeleg miks.

Eg gruer meg nesten til eg må sende tilbake skjermen til Asus. Konkurransespeling i 1440p 360hz er kanskje ikkje ein revolusjon, men det gir ei godkjensle eg sjeldan har opplevd i spel.

Vel, kanskje er det lommeboka mi som gruer seg. For denne skjermen skal eg kjøpe.

LES OGSÅ: Denne BenQ-skjermen er noko av det heftigaste pengar kan kjøpe »