Først av alt må eg berre beklage at vi feila å informere om månadens spel for ganske nøyaktig ein månad sidan. Eit stykk virus sette underteikna ute av spel ei stund. Ikkje så ille at det ikkje er godt for noko, og eg er to spel fattigare på backloggen.
Men nok om det. Sjølv om eg ikkje var til stade for å opplyse deg om det som skjedde, har andre tatt på seg det ansvaret. Eg snakkar sjølvsagt om kjernegjengen i Rad Crew som pliktoppfølgjande snakka om fantastiske Dragon's Dogma: Dark Arisens nylege lansering på Steam. Om du ikkje har spelt dette makelause meisterverket har du ingen god grunn lenger. Det er kanskje enda betre no når eg spelar det for tredje gong.
Nokre andre spel har blitt lanserte i januar. Vi finn til dømes det sterke spelet That Dragon, Cancer, det utfordrande grottekravlespelet Darkest Dungeon, og Braid-skapar Jonathan Blows ferske spel The Witness.
Men no skal vi sjå framover, og februar ser ut til å by på nokre verkelege godbitar i år.
XCOM 2
Plattform: Windows, Mac, Linux
Ute: 5. februar
2013 var eit godt år for alle som likar taktiske og turbaserte spel. Då blei XCOM: Enemy Unknown lansert, og blei møtt med vidopne armar. Tre år seinare er det tid for nye møte med sinte romvesen, men mykje har endra seg sidan sist. Vi tek opp tråden 20 år etter slutten på Enemy Unknown, og no har romvesna fullstendig tatt over verda vår.
Litt nede for teljing nektar menneska å gi opp kampen, og kjempar tilbake med dei midlane dei har. Konsekvensen av dette er at det no er menneska som invaderer romvesna. Du må rekruttere ei rekke nye soldatar, og vi blir lova større moglegeiter for å tilpasse krigarane slik du sjølv vil ha dei. Samstundes blir det fleire fiendar, større nivå, og større moglegheiter for utspekulerte strategiske planar.
Sjå bilete, les artiklar og finn beste pris på XCOM 2
Unravel
Plattform: PlayStation 4, Xbox One, Windows
Ute: 9. februar
Om du er på jakt etter noko heilt anna kan Unravel vere spelet for deg. I dette sjarmerande spelet frå svenske Coldwood Interactive reiser vi til nettopp Sverige, der vi i rolla som garnfiguren Yarny skal klare noko så enkelt som å kome oss framover. Med kroppen som verkty må Yarny kome seg forbi ei rekke hinder, og vi likte svært godt det vi såg då vi tok ein nærare kikk i fjor.
«Unravel er på mange måtar eit søtt, sjarmerande og ufarleg plattformspel. I hovedrolla finn vi ei tøydokke som ved sidan av å gi Sackboy god konkurranse, også klarar seg ganske bra i kamp med omgjevnadane. Laga av garn og kjærleik kastar Yarny seg gjennom nokre av dei vakraste og mest nasjonalromantiske omgjevnadane eg nokonsinne har sett i eit slikt spel.»
Sjå bilete, les artiklar og finn beste pris på Yarny
Street Fighter V
Plattform: PlayStation 4, Windows
Ute: 16. februar
Etter mange år med nesten like mange Street Fighter IV-spel er det no tid for å gå opp eit nivå. No er det slutt på Super, Ultra og Arcade Edition. Street Fighter V er her for å bli, og i staden for å by på nye utgåver med oppdaterte mekanikkar med jamne mellomrom, vil Capcom i staden sende ut oppgraderingar til alle som eig Street Fighter V.
Dette er ein konsekvens av at Capcom har eit stort ynskje om å nå langt fleire spelarar, og gjerne dei som aldri har spelt Street Fighter før. Med eit større publikum i sikte, håpar Capcom òg på å ta ein enda større bit av e-sport-kaka. Ved sidan av dette kan vi naturlegvis vente oss betre grafikk enn før, samt nye kampkjemper. Best av alt er kanskje at spelarar på PlayStation 4 og PC kan spele mot kvarandre.
Sjå bilete, les artiklar og finn beste pris på Street Fighter V
Far Cry Primal
Plattform: PlayStation 4, Xbox One
Ute: 23. februar
Far Cry-serien har vore god butikk for Ubisoft dei siste åra, og dei har heller ikkje vore redde for å ta serien i uventa retningar før. Det fekk vi sjå svært tydeleg i neonfestivalen Far Cry 3: Blood Dragon. Denne gong spolar Ubisoft tida mykje lengre tilbake enn til 80-talet. No er det steinalderen som skal taklast, og i Far Cry Primal trer vi inn i rolla som jegaren Takkar.
Som einaste overlevande i ein stamme må Takkar ordne alt sjølv. Han må mekke eigne våpen, knote saman nokre klede, og prøve å overleve i møte med folk som ikkje vil han vel. Heilt aleine er han likevel ikkje. Takkar kan temje ulike rovdyr til å kjempe ved si side. Om du vil ha ein sabeltanntiger, ulv, jaguar eller bjørn som bestekompis i skauen, skal du ikkje sjå bort frå at Far Cry Primal er spelet for deg.
Sjå bilete, les artiklar og finn beste pris på Far Cry Primal
Bravely Second: End Layer
Plattform: Nintendo 3DS
Ute: 26. februar
Eit av våre favorittspel frå 2013 var det herlege japanske rollespelet Bravely Default. Spelet er eit kjærleiksbrev til dei gamle japanske rollespela frå 90-talet, men små endringar på gamle formlar gjer likevel spelet til noko nytt og friskt. I oppfølgjaren kan vi stort sett vente oss meir av det same, men med nokre endringar her og der. Kampsystemet får til dømes nye funksjonar, og vi kan vente oss ei rekke nye jobbklassar for karakterane våre.
Historia tek opp tråden to og eit halvt år etter det første spelet, og vi møter igjen Tiz Arrior, helten frå det første spelet. Den vakre grafiske stilen frå det første spelet er naturlegvis tilbake, og vi kan berre sjå fram til nok eit nostalgisk, men likevel leikent rollespel i god, japansk stil.
Sjå bilete, les artiklar og finn beste pris på Bravely Second: End Layer
Mykje å ta tak i
Som vanleg finn vi ei rekke andre spel på timeplanen denne månaden, og nokre av dei kan godt mogleg vere enda meir interessante for deg enn dei vi har lista opp så langt. Blant dei finn vi den sideskrollande actionfesten Cobalt som blir utgjeve av Minecraft-studioet Mojang. Eit anna sideskrollande spel er neste kapittel i Ubisofts Assassin's Creed Chronicles-serie. Denne gong tek vi turen til Russland.
Langt friare spelerom får vi i PlayStation 4-utgåva av PlayStation Vita-spelet Gravity Rush. Her får vi leike oss med tyngekrafta som fokuspunkt. Meir tull med tyngekrafta kan du definitivt vente deg når Naruto for første gong tek turen til denne konsollgenerasjonen i Naruto Shippuden: Ultimate Ninja Storm 4.
Det finnest jamt over ei rekke japanske spel på slepplista i februar. I Pokémon Super Mystery Dungeon prøvar serien seg på ein roguelike-vri, og om du føretrekk Digimon kan du sjå fram til det nye rollespelet Digimon Story: Cyber Sleuth til PlayStation 4 og PlayStation Vita. Enda meir rollespelmoro får vi når det nesten uansvarleg suverene PlayStation 2-rollespelet Disgaea: Hour of Darkness etter alt for lang tid kjem til PC.
Om rollespel ikkje er heilt di greie kan du prøve deg på å løyse ei drapsgåte i snodige Danganronpa: Trigger Happy Havoc som òg kjem til PC. For dei som elskar anime, kan vi opplyse om at Dynasty Warriors-studioet Omega Force har laga eit actionspel basert på anime-serien The Heroic Legend of Arslan. Spelet har derimot fått den noko meir strømlinjeforma tittelen Arslan: The Warriors of Legend.
Om vi ser oss ferdige med Japan finn vi enda nokre fleire spel denne månaden. I Firewatch skal du leike brannmann i delstaten Wyoming, men du kan vere ganske sikker på at det er meir enn berre flammar som byr på utfordringar. Eventuelt kan du prøve deg på den psykedeliske grøssaren Layers of Fear.
Litt mindre grøss, men desto meir moro finn vi når Plants vs. Zombies: Garden Warfare 2 lanserast. Eg kan sjå føre meg at mange har venta lenge på nye slag mellom plantene og dei levande døde.
Heilt til slutt må vi naturlegvis ta med at fenomenet Rocket League endeleg lanserast på Xbox One.
Det var det for denne gong. God speling, og om du skulle merke deg at vi har gløymt noko essensielt får du gi oss streng beskjed om det i forumet.
