Den årlege E3-messa gjekk nyleg av stabelen i Los Angeles, og i eit hav av store kunngjeringar, kom det òg nokre som kanskje gjekk forbi i stille. Ei av dei var at Sniper Elite-studioet Rebellion har sett i gong arbeidet med ei ny tolking av Atari-klassikaren Battlezone. Dette vektorspelet frå 1980 lot oss spele i nokre av dei tidlegaste tredimensjonale miljøa spelbransjen har bydd på.
Med svært enkel grafikk flytta du ei stridsvogn rundt i svært enkle miljø fullt av geometriske former. Rebellions nye versjon vil difor bli ganske annleis, og blei kunngjort som eit VR-spel for PlayStation 4 via Project Morpheus, og for PC med enten Oculus Rift eller HTC Vive.
Battlezone 1998 får nytt liv
Originale Battlezone er derimot ikkje det einaste spelet i Battlezone serien Rebellion har bestemt seg for å pusse opp. I dag fortel Eurogamer at Rebellion vil pusse opp Battlezone frå 1998 òg.
Dette spelet hadde ikkje mykje til felles med Battlezone frå 1980, og gav oss eit spel i førsteperson som blanda skyting med strategi i sanntid. Utviklinga av nyversjonen av Battlezone er i eit så pass tidleg stadium at Rebellion ikkje kan seie noko om kva vi har i vente.
Rebellion kjøpte rettane til Battlezone for to år sidan etter at Atari såg seg nøydde til å selje unna ei rekke av sine eigedommar. Ein av dei var romstrategiserien Master of Orion som blei kjøpt opp av World of Tanks-studioet Wargaming.net. Eit nytt spel i denne serien blei avduka for berre få veker sidan.
Ein trailer frå VR-spelet Battlezone kan du sjå nedanfor.
