Då svenske Avalanche viste fram Mad Max for første gong møtte det ein del reaksjonar av det negative slaget. Hovudproblemet hadde ingenting med kvaliteten på spelet å gjere, men i staden at stemma til Mad Max brått hadde amerikansk aksent. For Mad Max-kjennarar er dette ei ganske stor endring, sidan Mel Gibson snakka australsk i alle Mad Max-filmane.
Den australske spelsida AusGamer starta ein underskriftskampanje for å få endra på dette, og den samla inn så mange underskrifter at Avalanche til slutt gav etter, og lova å endra på dialogen.
Frå bror til bror
Mad Max-skodespelar Mel Gibsons bror Donal Gibson har tydelegvis fått med seg dette, for han har via Urban Legend-regissør Jamie Blanks sendt ein mail til AusGamer med eit lydklipp fullt av dramatisk lyd og musikk der Donal gjer sitt beste for å høyres ut som Mad Max.
Donal Gibson er på si side ein erfaren stemmeskodespelar og har blant anna jobba med teiknefilmserien Justice League. Om Avalanche grip fatt i sjansen på å få ein Gibson med i Mad Max-spelet gjenstår å sjå. Om du klikkar deg vidae til AusGamer kan du høyre lydklippet og dømme sjølv.
Vi tok for øvrig ein kikk på det komande Mad Max-spelet under E3-messa i år. Marius var for det meste positiv til det han såg:
«Det er moro at Warner forsøker å gjenopplive Mel Gibsons gamle actionikon, og det blir svært spanande å sjå kva slags spel dette endar opp med å bli. Så langt kan vi i grunn berre konstatere at utviklarane ser ut til å forstå kva grunnelement som bør vere på plass i et Mad Max-spel, og håpe at dei klarar å setje desse saman riktig slik at vi får den fullverdige veikrigaropplevinga vi alle ynkjer.»
Les også: Anmeldelse: Rage Les også: Anmeldelse: Borderlands 2
