SAN FRANCISCO (Gamer.no): Metal Gear-sjefen Hideo Kojima likar å leike med folk. Det har han definitivt gjort den siste tida. Under VGA-utdelinga i desember kunngjorde det nye utviklarstudioet Moby Dick Studios spelet The Phantom Pain, og spekulasjonane om kor vidt dette eigentleg var ein stor spøk frå Hideo Kojima byrja raskt. Problemet var at Kojima allereie hadde kunngjort eit nytt Metal Gear Solid-spel; Metal Gear Solid: Ground Zeroes.
Under eit foredrag på GDC-messa i San Francisco i dag blei alt omsider klart. The Phantom Pain og Ground Zeroes er det same spelet, og får namnet Metal Gear Solid V: The Phantom Pain.
I dette spelet møter vi naturlegvis Snake igjen, men som du kan sjå i den dramatiske traileren vi har lagt til under artikkelen, har den gamle helten definitivt sett betre dagar. Etter ei dramatisk ulukke hamnar Snake på sjukehus, og der blir han. Etter å ha vore i koma i heile ni år vaknar han brått, berre for å bli dratt ut av senga av ein bandasjert mann som masar om at dei må skunde seg.
Traileren går ikkje inn i detalj på dette, men Kojima tok til kontrollaren sjølv for å vise oss litt av korleis Metal Gear Solid V startar. Etter å ha vore i koma i ni år har Snake blitt radmager og kan knapt bruke musklane sine. Han slepar seg bortover golvet i eit labert tempo medan den bandasjerte mannen sympatisk ropar til han at dei bør ta trappene. Etter ein del kryping fram og tilbake der Snake går frå å bruke henda, olbogane, og til slutt skludrane for å dra seg framover som ein larve – medan den bandasjerte mannen ikkje klarar bestemme seg for om trapp eller heis er det beste alternativet – kjem han seg omsider på beina.
Imponerande grafikkmotor
Her slutta derimot demonstrasjonen til Kojima, som var ein forlenga versjon av The Phantom Pain-traileren frå VGA. Kojima gav podiet til kollegaer som gjekk inn i detalj på korleis den nye grafikkmotoren FOX Engine fungerer i praksis. Vi fekk sjå mange døme på kva dei har fått til i si jakt på å oppnå fotorealisme. Mange ting er lette å avsløre, men Kojima Productions har likevel prestert å skru saman ein motor som kan lure auga til å tru noko er ekte sjølv om du veit det er digitalt.
Utviklarane demonstrerte dette gjennom å vise digitalt skanna objekt som eit hovud, ein stein, ein trestokk, samt ulike våpen. Detaljane som hoppar fram er tidvis så overbevisande at barriæra mellom røynd og fiksjon blir viska bort.
Kor mykje av dette som blir mogleg i Metal Gear Solid V: The Phantom Pain er derimot ei heilt anna sak. Sjølv om spelet ser fantastisk ut i si noverande form, er det kunngjort for Xbox 360 og PlayStation 3. Dette er altså ikkje eit neste generasjons spel enn så lenge. Mykje av det vi fekk sjå i dag skal godt gjerast å få til med dagens maskinvare.
Mest oppsiktsvekkjande med Metal Gear Solid V-avsløringa var derimot at David Hayter som har vore stemma til Snake i alle år, definitivt ikkje er med denne gongen. Kvifor kan ein berre spørje seg om. Hayter sjølv har via Twitter fortalt at han aldri ein gong blei spurt om å vere med.
Les også: Anmeldelse: Metal Gear Rising: Revengeance Les også: Konami jobbar gjerne med Platinum igjen
dette er konge
