Under ein auksjon i januar blei THQ sine interne studio og fleire viktige eigedomar selde til ulike kjøparar. Crysis kjøpte Homefront-serien, Ubisoft skaffa seg South Park-rollespelet frå Obsidian og THQ sitt Montreal-studio, medan Deep Silver-eigarane Kkoch Media kjøpte Volition og deira Saint's Row-serie.
Dette var derimot langt frå alle skattane i THQ-arkivet, og det har vore store spørsmål rundt kva som ville skje med resten. Dette vil få si avklaring under ei budrunde 1. april, fortel Eurogamer. I denne vil dei resterande eigedelane til THQ finne nye heimar, og det vil skje i seks ulike pakkar.
Den første av pakkane er Red Faction-serien som vil innehalde alle dei fire hovudspela i serien. Det nedlastbare spelet Red Faction: Battlegrounds ser derimot ikkje ut til å vere med. Homeworld-spela blir òg selde for seg i pakke to. Den tredje pakka er dei åtte spela i motorcross-serien MX, medan Darksiders-serien blir pakke fire.
Gløymde skattar
Dei to siste samlingane med eigedomar inneheld dei resterande titlane til THQ. Pakke fem inneheld alle dei interne eigedomane, medan pakke seks byr på lisensane deira.
Merkbare namn i desse to pakkane er seriar som Supreme Commander, Full Spectrum Warrior, samt rollespelserien Summoner, som har vore heller livlaus sidan PlayStation 2 var den største stjerna på konsollhimmelen. Ein anna rollespelserie som har ei solid fanskare er Titan Quest.
I tillegg vil Double Fine-spela Stacking og Costume Quest bli auksjonert bort. Double Fine har tidlegare vist interesse for THQ-auksjonen i januar, og vi skal ikkje sjå bort frå at dei vil prøve å få tilbake spela dei har laga.
Merkbare unntak frå samlinga med spel som skal auksjonerast bort er Warhammer 40K-serien. Kva framtida vil bringe for denne lisensen har vore høgst usikkert. Sega kjøpte Relic under THQ-auksjonen i januar, og har tidlegare skaffa seg lisensen for fantasyversjonen av Warhammer. Sjansen er difor høg for at Sega vil prøve å få full kontroll over Games Workshop sin mangeårige miniatyrspelserie.
Endeleg svar på kva som hamnar kvar få vi i løpet av april, og dei aller siste boda må vere inne før 15. april.
Les også: Left 4 Dead-skaperne fornøyd med THQ-auksjon Les også: Kriserammet THQ hopper på bundle-bølgen
