Det får no vere makan. Her sit ein stakkar og trur det kanskje blir ein roleg månad, der vi kan få tid til å puste mellom alle dei lovande spela. I staden er det like før vi kollapsar under vekta av verdas beste luksusproblem.
Der hausten ein gong i tida var årets mest intense epoke, er det no ei stygg fare for at heile året blir eit inferno for både tida og lommeboka. Mars er i år ei økonomisk katastrofe, ein månad så stappa full av spel at med mindre du likar berre ein type spel, og utelukkande den typen, så kjem du til å auke spelbiblioteket ditt med ein solid prosent.
Mars er ein månad full av nokre av dei aller største seriane som finnest akkurat no, samt nokre som ligg og ulmar rett under overflata. Dette kjem rett etter ein månad der vi har fått nokre herlege perler som Metal Gear Rising: Revengeance og Proteus, samt solid underhaldning i form av Crysis 3 og Dead Space 3. Nokre lappar har vi derimot spart på dei skuffande spela Aliens: Colonial Marines og Impire.
Å no skulle filtrere ut det «mest spanande» av bunken spel som dukkar opp i mars er ein utakknemleg jobb som berre vil skaffe meg fiendar, men la gå, vi hiv oss i det.
Tomb Raider
Plattform: PlayStation 3, Xbox 360, Windows Ute: 5. Mars
Vårt komande gjensyn med Lara Croft blir svært ulikt dei førre spela i serien. Utviklarane hos Crystal Dynamics har valt å starte serien frå byrjinga igjen, og fortel no historia om korleis Lara gjekk frå å vere ei uerfaren jente, til å bli den modige actionarkeologen vi kjenner.
Etter eit havari utanfor Japan endar Lara opp på ei tilsynelatande aude øy. Dette viser seg derimot kjapt å vere feil, og Lara blir raskt kasta ut i livsfarlege situasjonar og må kjempe for livet. Dette blir eit nøkkelpunkt i spelet som får eit stort fokus på noko så elementert som å overleve. Spelet lovar å by på ei mykje meir vaksen historie enn dei tidlegare i spela, og det heile ser ut til å bli både mørkt og dramatisk.
Les vår sniktitt på Tomb Raider
Se skjermbilder, videoer og finn beste tilbud på Tomb Raider
SimCity
Plattform: Windows Ute: 7. Mars (kommer i løpet av våren for Mac)
Om byplanleggjaren i deg har hatt ei tøff tid dei siste åra, er det endeleg tid for å benke seg ned bak skjermen for å skape din eigen metropol. I det nye SimCity får du enda større moglegheiter i korleis du skal få ein by på beina. Ikkje berre må du byggje ein velfungerane by med solid infrastruktur, men du må òg tenkje over korleis du brukar ressursane dine. Vil du lage ein miljøvenleg by, eller ein rik by basert på plyndring av naturressursar?
Alt dette kan du ta eit steg vidare i fleirspelarmodusen der du kan samarbeide med andre spelarar for å få ting til å gå knirkefritt. Innanfor ein region kan spelarane stable kvar sine byar på beina, og dele på ulike oppgåver. Om ein ikkje har alle frontar dekka skal ein ikkje føle seg trygg mot valdelege innbyggjarar, naturkatastrofer og det som verre er.
Les vår sniktitt på SimCity
Se skjermbilder, videoer og finn beste tilbud på SimCity
God of War: Ascension
Plattform: PlayStation 3 Ute: 12. Mars
Kratos er tilbake igjen for å denge mytologiske beist på særs blodig og makabert vis. Denne gongen får vi fortalt historia om kva som skjedde før det aller første God of War-spelet, og møter med det ein yngre Kratos, sjølv om det på ingen måte betyr at dei hypervaldelege dødssekvensane har blitt tona ned. Her blir det intens action med eit oppussa of raffinert kampsystem. At det ser fantastisk ut bør ikkje kome som eit sjokk.
Det store nye denne gongen er ein fleirspelarmodus der du kan spele mot og saman med andre spelarar. Du kan velje om du berre vil ta livet av andre spelarar, eller gå saman i to lag der det naturlegvis handlar om å slå motstandarane tilbake. Eit ekstra element i god of War-fleirspelaren er korleis du kan finne ein enorm Titan i bakgrunnen, ein skapning du kan tene stort på å ta ned.
Les vår sniktitt på God of War: Ascension
Se skjermbilder, videoer og finn beste tilbud på God of War: Ascension
StarCraft II: Heart of the Swarm
Plattform: Mac, windows Ute: 12. Mars
Det vakte både oppsikt og ein del harm då Blizzard kunngjorde at StarCraft II ville bli oppdelt i tre separate spel, i staden for å fortelje heile historia på ein gong slik dei har gjort tidlegare. Mykje av grunnen til dette er nok at dette – med Blizzard sine lange utviklingsperiodar i tankane – sørgjer for at det vil ta fleirfaldige år å få heile historia med seg. Ikkje utan grunn, nesten tre år etter Wings of Liberty held historia no fram.
I Heart of the Swarm er vi ferdige med Terran-kampanjen, og vi følgjer no Kerrigan i sin kamp for å styre Zerg til siger mot Arcturus Mengsk. Spelet vil kome med nye krigarar for både Zerg, Terran og Protoss, og fleire justeringar i både einspelaren og den svært populære fleirspelarmodusen.
Les vår sniktitt på StarCraft II: Heart of the Swarm
Se skjermbilder, videoer og finn beste tilbud på StarCraft II: Heart of the Swarm
Gears of War: Judgment
Plattform: Xbox 360 Ute: 22. Mars
Historia om Marcus Fenix og Dom er kanskje over, men det betyr sjølvsagt ikkje at Epic Games ser noko meining i å avslutte serien av den grunn. No spolar vi tida tilbake til før hendingane i det første Gears of War-spelet og Møter Damon Baird og Augustus Cole. Desse to er godt kjende frå før gjennom den svært populære serien, men først no får dei den ettertrakta hovudrolleposisjonen.
Dei tidlegare spela i serien har blitt utvikla av Epic Games, medan Judgment blir skapt av People Can Fly, studioet som gav oss skyteorgien Bulletstorm. Enkelte endringar må vi forvente oss av den nye utviklaren, men vi kan definitivt sjå fram til meir av den same skytefesten vi har blitt vande med. I fleirspelaren får vi nye modusar å leike oss med, blant anna den klassebaserte modusen OverRun.
Se skjermbilder, videoer og finn beste tilbud på Gears of War: Judgment
Bioshock Infinite
Plattform: PlayStation 3, Windows, Xbox 360 Ute: 26. Mars
Etter det klaustrofobiske Bioshock såg mange føre seg at det neste spelet frå Irrational Games ville bli eit nytt mørkt og dystert spel. Det vi får er derimot den rake motsetning. I Bioshock Infinite reiser vi til skybyen Columbia, ei fargerik og opa verd der blå himmel og kvite skyer erstattar mørkret.
Spelet har sett mange utsetjingar, men no er det endeleg klart for lansering. Vi møter Booker DeWitt som saman med Elisabeth må kome seg gjennom mange utfordringar. Irrational Games er kjende for å røre ved kontroversielle tema, og Bioshock Infinite blir i følgje utviklarane ikkje noko unntak. Spelet lovar å by på mange tankevekkjande episodar, ved sidan av heftige actionsekvensar der du kastar deg ut i meir eller mindre fritt fall blant skyer og fuglar.
Les vår sniktitt på Bioshock Infinite
Se skjermbilder, videoer og finn beste tilbud på Bioshock Infinite
Åtvaring: Fare for skred
Dette er berre dei aller, aller største titlane i mars. Sjølv om du ikkje finn noko som fell i smak akkurat her står det mange andre spel og ventar i kø på merksemda di. Om du likte Castlevania: Lords of Shadow kan kanskje 3DS-eventyret Mirror of Fate vere noko for deg, alternativt kan du sjekke om du er ein dyktig jegar i Monster Hunter 3 Ultimate som dukkar opp på både 3DS og Wii U. Skal vi halde oss til Nintendo dukkar LEGO City Undercover opp til Wii U, samt Luigi's Mansion 2 til 3DS på tampen av månaden.
For animefans kjem eit nytt spel om alles kjære Naruto. I Naruto Shippuden: Ultimate Ninja Storm 3 (phu) får vi garantert enda fleire sinnssjuke actionsekvensar frå utviklarane som er verdsmeistrar i å gje kontekstsensitive knapptrykk til knakande god underhaldning. Fargane held seg framtredande i Sly Cooper: Thieves in Time. Det er mange som har venta med einsame hjarte på å få møte vaskebjørnen igjen, og no får vi endeleg sjansen.
Vi skal faktisk halde oss i teikneserieland. Telltale Games har hatt enorm suksess med sine The Walking Dead-serie, og dette fører sjølvsagt til at andre vil prøve seg. I The Walking Dead: Survival Instinct frå Activision får vi eit mykje meir actionfokusert spel. Spørsmålet er om det kan måle seg med Telltale sin episodebaserte serie.
Om du ikkje får nok action med Gears of War, Bioshock Infinite og Tomb Raider vil EA lansere eit nytt spel i sin Army of Two-serie. I Army of Two: The Devil’s Cartel får vi atter ta på oss hockeymaskene for å spre gladvald, og naturlegvis er fokuset på samarbeid stort.
Til slutt tar vi med at Resident Evil 6 omsider får ein PC-versjon. Om du har sett fram til dette spelet, men ikkje har ein konsoll å spele på, er tida di komen.
Det var alt for denne gong, god speling, og god vår!
PS: Hugs at du kan bruke vår Spillkalender for å halde deg oppdatert på når storspela kjem i sal.
Les også: Dette gledet vi oss til i februar
