I 1994 dukka UFO: Enemy Unknown opp i Europa. I dette spelet fekk du ta kontrollen over spesialstyrka X-COM. Denne styrka hadde som oppgåve å handtere invasjonar frå rommet, og samtidig takle den stort sett overlegne teknologien dei utanomjordiske gjestane hadde å by på.
Spelet var eit turbasert strategispel der du sendte eit knippe soldatar rundt i forskjellige miljø i jakt på små, grå menn, og mykje meir. Du kunne plukke med deg utstyret til romvesna, og forske på det i ettertid for å betre kunne utruste deg sjølv. I tillegg hadde spelet eit solid fokus på basebygging og handtering av ressursane du hadde til din disposisjon.
For to år sidan blei eit nytt XCOM-spel kunngjort av 2K Games, men det er lite med dette spelet som minna om den gamle klassikaren, spesielt sidan spelet viste seg å vere i førsteperson. Difor var gleda stor hos mange då det tidlegare i år blei kunngjort at Firaxis jobbar med ei nytolking av den gamle klassikaren.
No har 2K Games i ei pressemelding kunngjort at XCOM: Enemy Unknown, som nytolkinga heiter, vil dukke opp i butikkhyllene for PC, PlayStation 3 og Xbox 360 12. oktober.
I likskap med originalen vil XCOM: Enemy Unknown vere eit turbasert og taktisk spel der du skal sanke utanomjordisk teknologi, forske fram nye våpen, og gradvis byggje opp spesialstyrkene dine for å handtere truslane mot planeten vår.
– Eitt av måla våre med nytolkinga av XCOM er å utvide opplevinga samtidig som vi hugsar på kva som gjorde UFO: Enemy Unknown til eit av tidenes beste PC-spel. Det er viktig å skape ei oppleving som appelerer til både eksisterande fans og nykomarar til XCOM-verda, som er nettopp det vi gjer med XCOM: Enemy Unknown, fortel 2K-visepresident Sarah Anderson i pressemeldinga.
Les også: De første smakebitene på nye XCOM Les også: Strategi-XCOM støtter mods
